تاج سياسة الامر الواقع

تاج...سياسة الامر الواقع

التاج ده انا شوفته عند صديقتى وحبيبة قلبى رنا

وهى قالت اللى عايزه يتفضله ذي ماهى عملت مع انجى ، او اى حد فى الناحيه الشمال

انا مش عارفه بأه انا مين فيهم اللى فى الناحيه الشمال ولا اللى عايز التاج وبس

بس انا هاخده بأه بمنتهى البجاحه مش مهم لحد ما اعرف انا فى الناحيه الشمال ولا من اللى عايزين ياخدوا التاج كده وخلاص

- اسمك؟

اسماء احمد محمد بس انا كتباه بالانجلش فوق هو مش باين ولا ايه ؟؟-

المشهور بيه وسط اصحابك؟

انى مشكلة وماليش حل وقصيرة وأزعه ودايما لما ينادوا عليه يقولوا ( actress او برنسس) وده طبعا لانى امنية حياتى اكون

ممثلة ، والناس بتدلعنى تقولى يا سوسو، سمسم ، سمسمه، ساسو ، حاجات كتير وساعات بوسى او بوسبوس يعنى الدلع كتير وافتكر

انى مدلعه اوووووى............

- مجال دراستك؟

اهو لسه بنقول يا هادى السنه الجايه ان شاء الله اكون فى 2 اعدادى....

- اسم مدونتك؟

كانت اسمها (لاتتجهم انت لاتعلم من سيقع فى حب ابتسامتك )ودلوقتى اسمها( الحياة حفلة تنكرية) لانى اعتقد فعلا ان الحياة حفلة تنكرية كبيرة .....

- صورتك الرمزية بتعبر عن ايه؟

ناس متفرقين كانوا فى حفلة تنكرية لانى ذى ماقولت اعتقد ان الحياة حفلة تنكرية كبيرة ملهاش اول من اخر.......

- هل فكرت فى اغلاق مدونتك؟ والسبب؟

عمري ما فكرت وعمري ما هفكر ان شاء الله...انا شايفة ان عالم التدوين زيه زي اي عالم فيه الحلو وفيه الوحش...انا مدخلتش

التدوين عشان اطلع منه....لأني ببساطة ماصدقت دخلته

ماعتقدش انى ممكن اغير كلمة فى اللى قالتها رنا لان ده فعلا اللى انا عايزه اقوله........

- ايه رد فعلك لو حد قل ادبه فى تعليق؟

انا معنديش ناس كتير بتعلق غير اللى اعرفهم 2 لانى لسه جديدة فى الخط يعنى ، ولو ده حصل همسح تعليقه بكل هدوء.......

- اسوأ مدونة؟

اى مدونة مش كويسه اكيد مش هتعجبنى ولا ايه؟.........

- هيحصل ايه للميل بعد ما تموت؟

بالله عليكوا ده سؤال يتسأل اكيد يعنى هكون بتحاسب ولا لسه هقعد افكر فى الاميل والشات ده انا هبأه بقول يا حايطه دارينى ومافيش

حاجه هتدرينى يعنى اهو كلام ومع ذلك الاميل هيتقفل بعد ما اموت او ممكن اختى تفتحه.....

- اديت الباس وورد لحد قبل كدة؟

انا مش بادى لاى حد الباس وورد بتاع حياتى الشخصية لانى مش بحب حد يدخل فى حاجه تخصنى ومش بحب احكى حاجه تهمنى انا

وبس لاى انسان لان محدش هيتألم من الحاجه دى غيري او هيفرح من الحاجه دى غيري

بس بردو اديته لشخصية واحده بس اللى بثق فيها ثقه عمياء (اختى الحبيبه).....

- السفر بالنسبة لك ايه؟

حريتى اللى نفسى اخدها مع انى واخده كل حريتى مع الناس اللى عايشه معاهم بس فى حاجات بردو نفسى اعملها لما السفر يجي انى

استقل بنفسى واعتمد على نفسى اصلى مش بعتمد على نفسى خالص بعتمد على ماما واختى دايما ، واكيد فى السفر فلوس وده اللى

يجيب اى حاجه لحد عندك ...

- المود بتاعك ايه؟

انا معرفش مودى ايه ، يعنى انا بحالات ساعه دمى خفيف واضحك اللى حوليا واكون بلعب واتشقه ، وساعه تانية اكون ممله و مش

عايزة حد معايا عايزة اكون لوحدى واقعد فى الضلمة افكر ....

- بتعمل ايه فى وقت فراغك؟

النت اكتر حاجه واخده وقتى انا تقريبا مدمنه نت تقريبا ده ايه ده اكيد، وبعد كده التمثيل ، ثم الكتابه والقراءة

والاكيد ان ماما مش بترضى تودينى عند اصحابى او بمعنى اصح اخرج مع اى حد منهم لان الوحش اكيد بيعدى الكويس لكن لايمكن

الكويس يعدى الوحش ........

- اكتر حاجات بتكرههم؟

بكره الفقر، وقلة الحيله، وقلة الفلوس، والانعدام فى الحب ، وكلمة منين اجيبلك ، ومافيش، و مش عارف مع انه بيكون عارف كل

حاجه ، وحاضر مع ان كلمة حاضر بتريح ماما دايما تقولى كده، وجملة ماتلبسيش ده اصله ضيق اوى او عريان ، وجملة انا شايله ده

لحد ما تتجوزوا علشان اديهولكوا وليه يعنى اتمتع بحياتك قبل مايفوتك قطر الحياة ، مش بحب الكوسة، والسبانخ ،والمكرونة

بالبشاميل، و المكرونة باللبن (بسكر) ، مش بحب عصير الفراولة، والمانجا، والجوافه اى حاجه تقيله يعنى باختصار مش بحب انواع

كتير بردو من العصاير وبكره اللى مايوفيش بوعده ليا ،واللى يكدب عليا.......

- اكتر حاجات بتحبهم؟

اي كلمه حلوة بترضينى وبقتنع بيها مهما كانت صغيرة...بحب التمثيل، والشعر، والكتابه ، بحب الموسيقى الهاديه ، وساعات احب

الراب ... بحب داليا البحيري اوى ، ونزار القبانى ،واغانى زمان ، ونجاة ،وحليم، و عبد المطلب ، و اميمة الخيل. ...بحب الفن الكله

والفنانين..وبحب الاكل جدا مع انى مش بأكل انواع كتير منه اكتر اكله بحبها المحشى ، و البسله ، بموت فى عصير العناب مع انه

يوطى الضغط دايماا اطلبه من ماما تعمله ليا لو تعمللهم اى عصير مش بحبه ،بحب اشيل الاطفال الصغيرين ، والعب معاهم بس

ماحبش انى يكون عندى طفل ممل ويعيط كتير اول ما اى طفل فى ايدى يعيط اجرى اديه لماماته.....وبحب حاجات كتييييييير اوى اوى

- شخصيتك نوعها ايه؟

ياااااااه ده سؤال غبى اوى ... لانى معرفش حتى انا مين انا بتوه من نفسى معرفش انا بروح لحد فين ومين بيرجعنى تانى ليا .... وذى

ماقولت قبل كده ما بحبش حد يتدخل فى حياتى او يعرف حاجه عنى .....

لماذا دخلت عالم التدوين؟

ده السؤال اللى انا مستنياه من ساعة ما بدأت اجاوب على الاسئله الكتيرة دى انا جيت بالصدفة حب استطلاع وبعدين لقيت نفسى حبيته

اوى ومقدرش استغنى عنه لانى حسيت انه هيوصل صوتى لناس كتير ناس تعرفنى ناس تحسنى بجد وقرب قرب قرب واللى مايشترى

يتفرج.... ويا خبر بفلوس بكرة يبأه ببلاش...

- اجمل جملة قيلت فى وصف مدونتك؟

كل اللى اتكتب لحد دلوقتى جميل اوى و بحب التعليقات دى جدا........

- احلى بوست كتبته؟

الله واعلم بس افتكر انه بوست ( للعلم بالشىء فقط) واكيد فى حاجات جايه كتييييييير هتكون احلى .....

- افضل مدونة قريتها؟

انا بحب جدا مدونة عالم الماريونيت وبستنها تنزل اى بوست بفارغ الصبر بس اعتقد انى ممكن اميل لها اكتر وفى لحظها انسها لانى

ذى ماما بتقول انت بتاعت وقتك وقتك

- افضل بوست قريته؟

مش عارفه والله حاجات كتير بس بحب اوى البوستات اللى تلمسنى تدخل تكسر كل مكان جوايا .....

- الشغل بالنسبة لك ايه؟

تحقيق كل احلامى حتى اللى بكون صاحيه فيها

الانترنت بالنسبة لك ايه؟

ادمان ، بحبه ذى مايكون مثلا خطيبي فى اعتبار ماسيكون مع انى معتقدش ده . الصراحة ده افضل صديق عندى بيفدنى كتير اوى ومش

عايز المقابل...........

- تمرر التاج لمين؟

اى حد يحب ياخده يتفضله انا مابحبش اكسف حد انا باجى كتير على نفسى علشان مكسفش حد اظن ده بأه اللى عايزه مش هقوله لاء بس نفسى امرره لانسانه نفسى اعرفها بجد

(H-A)

شعار النساء : أنا اشتري .. إذن أنا موجودة

قرأت مقال فى صحيفة بانيت عجابنى اوى قلت اطرحه فى مدونتي ،وجاء هذا المقال كالاتي :

العنوان : شعار النساء : أنا اشتري .. إذن أنا موجودة
وصلت الى موقع بانيت وصحيفة بانوراما ، عبر البريد الالكتروني ، رسالة من متصفح للموقع حول ظاهرة التسوق عند النساء ، جاء فيها:
" كم أتمنى أن يأتي يوم تخبرني فيه زوجتي بأنها أصبحت تكره السوق والتسوق . لكنها أمنية ما أحسبها ستتحقق أبدًا ، فحب التسوق مغروس في قلبها ، يخالط لحمها ودمها ، لا تمل الذهاب إلى السوق ، تدخل محلاً وتخرج من آخر ، دون تعب أو كلل ، في همة شماء ، وعزم ومضاء . وأسألها عندما تبدي رغبتها في الذهاب إلى السوق : هل تحتاجين شراء شيء ؟ فتجيبني في استنكار واستغراب : وهل يجب أن أكون في حاجة إلى ما أشتريه حتى أذهب إلى السوق ؟! وكثيرًا ما أُذكرها بوصف النبي صلى الله عليه وسلم للأسواق بأنها أسوأ الأماكن وأبغضها إلى الله ، ولكن دون جدوى . وأجد لي عزاء في أن النساء جميعهن - أو أكثرهن - على هذا العشق للتسوق والتعلق به ، حتى إن دراسة بريطانية أكدت أن الحالة الصحية للمرأة تتحسن في أثناء تجوالها في الأسواق ، بينما يرتفع ضغط الدم لدى الرجل ، وتتسارع نبضات قلبه ، وتتوتر أعصابه . وقرأت اليوم كلامًا لمتخصص في علم النفس عن التسوق الذي وصفه بـ "الحمى" : أجل " حمى التسوق" حيث يقول " إن التهافت على المتاجر ليس مجرد تسلية ، إنه استجابة لحاجة ملحة ، استجابة تحقق لها الراحة . وأعجبني اعتراف لإحدى النساء بأنها ضحية سهلة لأحابيل إعلانات التخفيض ، وبريق واجهات المحلات ، تقول هذه السيدة : " عندما أكون قلقة ومتوترة فأول شيء أفكر فيه هو التجوال في المتاجر ، حتى صار الأمر عندي مثل الإدمان". وإذا اشتهر قول ديكارت " أنا أفكر إذن أنا موجود " ، فإن امرأة أخرى تقول : " أنا اشتري .. إذن أنا موجودة" فتؤكد بهذا ارتباط التسوق بالنساء ارتباطًا وثيقًا لا انفكاك منه أو عنه . لهذا كله صرت أعذر زوجتي في شدة حبها التسوق ، وقوة تعلقها به ، وعدم سأمها منه ، وتجدد نشاطها كلما رغبت فيه لكنني وضعت ضوابط لهذا التسوق هي : - مرافقتي لها ، أو مرافقة أحد أبنائها ، لزيادة احترام الباعة لها والتزامهم الأدب في تعريف سلعهم وتسويقها . - إذا كنت المرافق لها أخبرتها أن تسوقنا سينتهي قبيل أذان المغرب أو أذان العشاء ( حسب وقت تسوقنا) لنصلي في المسجد ونختم بالصلاة جولتنا التسويقية ، وبهذا أمنعها من التراخي في التجول بين المحلات والتعجيل بشراء حاجاتها . - اذا كان ولدي هو المرافق لها فإنني أحدد لهم المكان الذي سأجدهم فيه والزمان الذي يسبق موعد الأذان بقليل . - أوصيها بالعمل على شراء ما تحتاجه في تسوقها اليوم ، لأنه لن تسنح لنا فرصة أخرى في القريب للذهاب إلى السوق .. وبهذا أحول دون تكرار الذهاب إلى الأسواق لشراء هذا الذي لا يتم شراؤه عادة إلا بعد عدة زيارات للأسواق . أخيرًا ، فإنني لا أخفي عليكم أنني أستفيد أحيانًا من تعلق زوجتي بالتسوق ، فأشترط عليها قضاء وتلبية طلبات لم تكن تقضيها وتلبيها ، قبل أصطحبها إلى السوق".

الرجل الحقيقة عنده حق يعمل اكتر من كده
انا عن نفسي كل شوية اقول لمامتى نفسي فى 20 مليون جنية، 10 مليون فيلا صغيرة على ادى، و5 مليون اعمل بيهم شوبينج، و ال5 مليون الباقين افتح بيهم مشروع صغير (استديو) .....
بستمتع بحاجه اسمها شوبينج
وبحب التصوير جدا وبحب اتصور اوى
ونفسى مخرج ابن حلال يكتشفنى انا موهبه جامده اوى يعنى......

تعالى يا ام محمد، وانا اعرفك انت مين؟

تعالى يا ام محمد، وانا اعرفك انت مين؟

اعرفكم بأم محمد ، دى واحده كده ساكنه عندنا فى البيت عاملة ذى الوحوش طريقة كلامها واسلوبها مقذذين بيكون عندى رهبه بشكل غير طبيعي منها ومش عارفه ايه السبب .
المهم عايزنى ادخل فى الموضوع على طول ولا اتكلم على ام محمد شوية ، اصل لو قلتوا اتكلم على ام محمد شوية مش هبطل كلام ، فمن الاحسن ادخل فى الموضوع على طول ، شوفوا بأه وانتوا احكموا ....
فجأة وانا قعدة على الكمبيوتر وبكلم ناس على النت لقيت سلك النت اتشال من عند ام محمد .
فندهت وقولت: `يا سلمى ..، يا سلمى ..`
مين اللى رد عليا..؟؟؟، وقالتلى: ` نعم يا اسماء `،

فرديت وقولتلها: ` ايوة يا طنط سلك النت مفصول ` ،

قالتلى:` اه بس احنا مش فاضين دلوقتى يا اسماء` ،

فرديت وقولتلها :` طيب يا طنط ` ....

وبعدها دخلت الاوضة وحكيت لاختى على كل اللى حصل ،

فردت وقالتلى ` البسى واطلعى اعملى انت السلك `،بمعنى اصح (قعدت تسخن فيا)،

فطلعت لقيتهم بينظفوا الشقة ، فقلتلهم : `عايزة اظبط سلك النت `

، فبنتها ردت عليا : ` انا شلت السلك علشان مايتقطعش يا اسماء` ،

فقولتلها: `طيب بسرعة والنبى علشان عايزة النت اصلى بكلم ناس مهمين اوى` ، وفجأة ام محمد دخلت فى الكلام ذى (القضا المستعجل) ،

فقالت: ` بسرعة اه بسرعه اه هنعملهلكم بسرعة` ، (وفى نبرة صوتها سخرية واستهزأ بطريقة مش كويسة) ....
فنزلت من عندها وانا مضايقة فقولت لمامتى واختى على اللى حصل ..
فردت ماما بكل لا مبالاه : ` وفيها ايه يعنى يا اسماء هى طريقة كلامها واسلوبها كده لازم نتعود عليها ` ،

فردت اختى: ` هى بتحسيسنى ان احنا اللى ساكنين عندها مش هى اللى ساكنة عندنا ` ، فرديت وقلت لماما:` واحده غيرك كانت هزأتها ومرمتت بكرامتها الارض` ،

فردت ماما: ` انا ، انا اعمل كده ، انا انزل مستوايا للبيئة دى ` ،، وانتهى الحديث على كده....
وقعدت بأه أبرطم بالكلام واشتم فيها وانا مضايقة ومخنوقه ، وبالصدفة ليقتها حطط سلك النت ، فسكت ومن هنا حسيت انى ذى الكلب لما نرمى له عظمة فيكف عن النباح . فزعلت جدا من الموقف ده .....
ياترى بأه انتوا شايفين مين اللى غلط فينا انا ولا تلك المتوحشة!!!؟؟؟؟.........

غيرت لوك المدونة

حبيت اغير لوك المدونة بتاعتى مع انى مكملتش شهر عملاها بس غيرته علشان اعتقد فعلا ان الدنيا كلها على بعضها حفلة تنكرية ، نعم حفلة تنكرية كبييييييييييييرة ملهاش اول من اخر، كل واحد لابس قناع ويغير فيه ويلبس قناع تانى واهيه كلها اقنعه، متهيألى ان الناس كلها لابسه اقنعه علشان تعرف تعيش بس انا عمرى ما احب البس قناع غير ادام كاميرة التصوير اكيد علشان الدور هو اللى عايزنى البس الاقنعة واتحول من ده لده، انا اعرف اتنين يمكن هما بس اللى مش لابسين اقنعة الدنيا وجايز لما يقرأوا المدونة ويشوفوا اللوك الجديد يعرفوا نفسهم لانهم بجد حد جميل اوى ، المهم لازم تعرفوا ان الدنيا كلهاااا حفلة تنكرية ملهاش اول من اخر!!...